Адрас:
Вул. Советская 38
г. Рагачоў 247673
Рагачоўскі р-н
Гомельская вобл.
Тэлефон: +375 33 696 48 02
Электронны адрас: Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.
Расклад набажэнстваў:
Святая Імша ў нядзелю і святы - 12.00
Святая Імша ў будні - 18.00
Святая Імша ў суботу - 9.00
Былы рымска-каталіцкі касцёл размяшчаецца ў паўднёвай частцы г.Рагачова па вул. Валадарскага і Фрунзэ.
Пасля таго, як у канцы 60-х гадоў з будынка касцёла вывезлі рагачоўскі хлебазавод, будынак практычна застаўся без уладальніка. Мясцовыя жыхары з суседніх вуліц горада літаральна разабралі прыбудовы з цэглы, дошкі ад плота і г.д., а тэрыторыю касцёла ператварылі ў сметнік для бытавога смецця, сам будынак прыйшоў у заняпад і быў зруйнаваны.
Пошукі гістарычных звестак аб рагачоўскім касцёле вяліся краязнаўцамі і арганізацыямі ў розны час у бібліятэках горада Мінска, Вільнюса і Ленінграда, у Цэнтральным дзяржаўным архіве СССР (г.Ленінград), Цэнтральных дзяржаўных архівах Беларускай ССР і Літоўскай ССР, у Магілёўскім абласным краязнаўчым музеі, а таксама ў інстытуце Польскай акадэміі навук.
Згодна з лістамі (исх.490/79/72) ад 24.03.1972г. намесніка дырэктара інстытута гісторыі Польскай акадэміі навук прафесара Януша Тазбіра на імя старшыні выканкама Рагачоўскага Гарадскога Савета Дэпутатаў Працоўных А. Чубкова, нам вядома, што ў 1783г. у г.Рагачове ўзведзены драўляны парафіяльны касцёл «Беззаганнага зачацця святой Дзевы Марыі».
З наяўных дакументаў вядома, што ў 1783 годзе намаганнямі іераманаха бернандзінскага ордэна Звагрыя Янкевіча ў г.Рагачове на сродкі, ахвяраваныя Рагачоўскай шляхтай і мясцовымі жыхарамі-каталікамі, было распачата будаўніцтва драўлянага касцёла. Будаўніцтва хутка скончылася, і 26 кастрычніка 1783 года дэкан Беліцкі ксёндз Людоўскі асвяціў пабудаваны касцёл у імя Маці Божай Святой Панны Марыі.
Касцёл быў пабудаваны на цагляным падмурку, уваход з боку вуліцы (цяпер вул. Валадарскага). Даўжыня будынка 10 сажняў (каля 21,3м), шырыня будынака - 4 сажні і 1 аршын (каля 9,2м), дах пакрыты драўлянай дошкай - гонтай, сцены абшаляваныя дошкамі і пафарбаваныя, падлога і столь зроблены з дошак.
На кожным бакавым фасадзе касцёла знаходзілася па тры вялікіх акна, на асноўным фасадзе - два меншыя вокны і над галоўным алтаром - адно малое. Будынак касцёла меў прамавугольную форму. На галоўным фасадзе былі размешчаны дзве вежы, паміж імі знаходзіўся франтон, на якім была ікона святога Антонія Падуанскага. З апісання бачна, што рагачоўскі касцёл быў пабудаваны ў стылі барока (фота або малюнка не захавалася).
Прайшлі гады. Касцёл дзейнічаў. У 1863-1864 гадах, пасля разгрому нацыянальна-вызваленчага паўстання Кастуся Каліноўскага, царскім указам на Беларусі было зачынена дзевятнаццаць бернардынскіх касцёлаў, сярод якіх быў рагачоўскі касцёл «Беззаганнага зачацця святой Панны Марыі», але прыход працягваў дзейнічаць.
На працягу дзевятнаццатага стагоддзя касцёл неаднаразова рамантаваўся, але, нягледзячы на рамонты, прыходзіў у заняпад і разбураўся. Напачатку дваццатага стагоддзя яго стан быў вельмі дрэнны.
У 1910-1911 гадах энергічны і прадпрымальны па характары чалавек ксёндз Бернатовіч, тагачасны пробашч рагачоўскага касцёла, пачаў будаўніцтва новага цаглянага храма на месцы драўлянага.
Сродкі на будаўніцтва новага касцёла ахвяравалі члены Дзяржаўнага савета Сеножэнскі, Клуніцкі і Хадасевіч. Прыхаджане-каталікі ахвяравалі грошы на будаўніцтва касцёла, а таксама непасрэдна ўдзельнічалі ў будаўніцтве.
Варта адзначыць, што сярод жыхароў г.Рагачова хадзіла легенда, што пан Сеножэнскі, які ахвяраваў на будаўніцтва касцёла некалькі тысяч рублёў золатам, пабудаваў храм на свае ўласныя сродкі ў падарунак сваёй каханай жонцы.
Касцёл быў пабудаваны за паўтара года, кошт яго будаўніцтва склаў больш за трыццаць тысяч рублёў.
Новы касцёл быў пабудаваны з чырвонай глінянай цэглы на высокім падмурку. Сцены знадворку неатынкаваныя. Касцёл прамавугольнай формы, дах з чарапіцы, двухсхільны. Унутры асноўная плошча касцёла падзелена чатырохграннымі калонамі на тры залы. Цэнтральная зала пераходзіла ў пяцігранную вежу. Масіўная трох'ярусная вежа на асноўным фасадзе была ўвенчана вострым шатром. Вышыня касцёла ад зямлі і да канца востраканцавога шпіля на вежы складала 30,3 метры. Касцёл з'яўляецца помнікам неагатычнага стылю.
Касцёл быў асвечаны ксяндзом Красоўскім у імя святога Антонія. Датай асвячэння лічыцца 6 жніўня 1912 года.
Паводле сведчанняў мясцовых жыхароў, служба ў касцёле праводзілася пастаянна, але касцёл быў зачынены ў 30-х гадах 20-га стагоддзя, у 1935-1936 гадах у касцёле размяшчаўся склад зерня.
У канцы 30-х гадоў у будынку зачыненага касцёла святога Антонія быў адкрыты цэх арцелі «Чырвоны пекар», у якім выраблялі напоі (морс і ліманад) і марожанае. Улетку 1940 гада ў цэху адбыўся пажар. Полымя бушавала ўнутры моцных цагляных сцен касцёла, вельмі хутка агонь дабраўся да паддахавых перакрыццяў, абгарэлі страпілы і брускі, абваліўся чарапічны дах будынка, пасля чаго загарэліся драўляныя канструкцыі высокага востраканцавога шпіля над галоўным уваходам. Ахоплены агнём, абваліўся і ён. Гэты пажар знішчыў інтэр'ер касцёла.
Рагачоўская пажарная каманда не змагла патушыць пажар у касцёле, хоць былі задзейнічаны дзве пажарныя машыны, увесь асабісты склад гарадской пажарнай каманды і гараджане. Пажарная каманда, безумоўна, рабіла ўсё магчымае, каб спыніць пажар, але сіл і сродкаў не хапіла, каб выратаваць касцёл.
Пасля пажару з бляхі быў зроблены новы касцёльны дах. Востраканечны шпіль над вежай не ўзнаўляўся, быў зроблены рамонт унутры будынка і далей касцёл выкарыстоўваўся як склад.
Падчас вайны 1941-1945 гадоў касцёл пацярпеў ад снарадаў і асколкаў.
Будынак касцёла быў самым высокім у амаль цалкам згарэлым г.Рагачове. Было вырашана на месцы шпіля паўразбуранай згарэлай вежы касцёла размясціць пажарны пост для назірання за горадам на выпадак пажараў, што ў 1944 годзе, пасля вызвалення горада, было зроблена. Пажарны пост размяшчаўся на касцёле да 1948 года, дзе ўвесь гэты час дзяжурыла гарадская пажарная каманда.
19 красавіка 1947 года, згодна з актам бюро тэхнічнай інвентарызацыі г.Рагачова, будынак касцёла святога Антонія пачаў выконваць функцыі хлебазавода. У 1950 годзе да будынка касцёла была зроблена прыбудова з цэглы. У 1978-1980гг. хлебазавод з будынка касцёла пераехаў у нядаўна пабудаваны будынак хлебазавода.
У 1988-1989 гадах групай краязнаўцаў г.Рагачова была распачала праца па падрыхтоўцы да рэстаўрацыі будынка касцёла святога Антонія. Уздымалася пытанне аб яго рэстаўрацыі ў раённай газеце «Камунар» і ў гарвыканкаме. Для садзейнічання дадзенай справе ў 1989 г. пры музеі «Народнай славы» г.Рагачова было створана краязнаўчае таварыства «Замчышча». Нягледзячы на ўсе намаганні, пытанне аб рэстаўрацыі касцёла так і засталося адкрытым.
Так і працягвае пуставаць будынак касцёла да нашых дзён.
У Рагачоўскім райвыканкаме ёсць праектна-каштарысная дакументацыя на рэканструкцыю будынка касцёла святога Антонія. У 1999 ці 2000 годзе падчас наведвання г.Рагачова рымска-каталіцкім кардыналам Беларусі вырашалася пытанне аб рэстаўрацыі касцёла святога Антонія.
На сённяшні дзень касцёл святога Антонія перададзены каталіцкай супольнасці г.Рагачова.
Пробашч - кс. Алег Грыгаровіч SAC
Адпуст: 13 чэрвеня