2–5 студзеня 2024 г. у  горадзе Баранавічы, у доме Найсвяцейшай Тройцы айцоў Вербістаў, прайшлі адмысловыя дні Паллатынскай моладзі, якая прыбыла з парафій    Бярозы, Мінска, Воранава, Жлобіна, Германішкаў. Мерапрыемства было арганізавана айцамі Паллатынамі і сёстрамі Паллатынкамі і прыцягнула каталіцкую моладзь з розных куткоў краіны, якая жадала паглыбіць сваю веру, знайсці новых сяброў і чэрпаць натхненне з духоўнасці Св. Вінцэнта Паллоцці.

Праграма Паллатынскіх дзён моладзі была насычана рознымі мерапрыемствамі, якія спалучалі малітву,  удзел у святой Імшы і весялосць; праходзілі канферэнцыі, моладзь мела магчымасць праслухаць займальныя і карысныя лекцыі  на тэмы: «Сацыяльныя сеткі, небяспека і карысць» і «Мне 12-17 год, чаму мяне не разумеюць?». 

Малітва была адным з найважнейшых элементаў Паллатынскіх дзён моладзі, юнакі і дзяўчаты мелі магчымасць супольна маліцца і разважаць. Надзвычай важным аспектам гэтых дзён быў удзел у святой Імшы.Усе ўдзельнікі маглі разам адчуць прыгажосць і вялікасць Сакрамэнту Святой Эўхарыстыі,  пазнаць еднасць і моц, якую дае супольнасць вернікаў.

Весялосць і інтэграцыя таксама былі цікавымі момантамі Паллатынскіх дзён моладзі. Тэматычныя вечары, гульні, размовы дазволілі маладым удзельнікам знайсці новых сяброў і падзяліцца радасцю, быць часткай гэтай вялікай супольнасці. Атмасфера ўзаемаразумення і падтрымкі натхняла маладых людзей у будучым пераадольваць межы і працаваць для ўкаранення хрысціянскіх каштоўнасцяў у штодзённым жыцці.

Паллатынскія дні моладзі ў Баранавічах былі не толькі нагодай для шчырай малітвы і вялікай радасці, але таксама часам разважання і ацэнкі ўласнай духоўнасці. Маладыя людзі былі заахвочаны да таго, каб уплываць на сваё асяроддзе, якое імкнецца стаць лепшымі католікамі па прыкладзе Св. Вінцэнта Паллоцці. Малітва, святая Імша і канферэнцыі былі моцным падмуркам да таго, каб у далейшым яднаць высілкі на развіццё веры і ўмацаванне духоўнай лучнасці маладых католікаў з Богам. Гэтыя дні былі таксама адмысловым момантам сустрэчы моладзі з людзьмі, якія прысвяцілі сваё жыццё Богу, магчымасцю непасрэднага паглыблення адносінаў з Панам, часам іх духоўнага ўзрастання. Гэтая ўнікальная падзея нагадала ўсім удзельнікам, наколькі важным у жыцці з’яўляецца асабістае духоўнае развіццё, а таксама моц і прыгажосць каталіцкай веры.

Кс. Павел Зайцаў SAC